Kwa mujibu wa Shirika la Habari la Hawza, Ayatullah Ali Reza A’rafi, katika ujumbe wake wa kuadhimisha kuwadia Wiki ya Ulinzi Mtakatifu, amesisitiza kwamba: Ulinzi Mtakatifu wa miaka minane ya taifa la Iran, sambamba na Ulinzi Mtakatifu wa siku kumi na mbili na Vita vya kulazimishwa vya Ramadhani, ni awamu tatu za juhudi za taifa la Iran ambazo zina mifanano kadhaa, zinaunganisha historia ya muqawama wa taifa la Iran, na kuiweka safu ya umoja ya wananchi mbele ya adui wa pamoja kuwa yenye mshikamano zaidi.
Mkurugenzi wa Hawza nchini Iran, akifafanua mifanano 10 ya juhudi za wananchi katika awamu tatu za Ulinzi Mtakatifu, amewataka viongozi, mihimili mitatu ya dola, vikosi vya kijeshi vyenye heshima na nguvu, pamoja na wananchi mashujaa na jasiri wa Iran, waendelee kuwa imara, wenye subira na wastahimilivu, na wajitahidi katika kutatua matatizo ya kiuchumi, kuongeza mtaji wa kijamii, kuimarisha umoja na mshikamano mpana, pamoja na kupambana na madhara ya kiutamaduni, kimaadili na kijamii.
Endelea kusoma ujumbe kamili wa Ayatullah A’rafi:
Kwa jina la Mwenyezi Mungu, Mwingi wa Rehema, Mwenye Kurehemu
﴿فَلَا تُطِعِ الْكَافِرِینَ وَجَاهِدْهُم بِهِ جِهَادًا کَبِیرًا﴾
(Al-Furqan: 52)
Maadhimisho ya mwaka wa 46 tangu kuanza kwa uvamizi wa maadui dhidi ya nchi ya Kiislamu na Wiki ya Ulinzi Mtakatifu, ni ukumbusho wa kishujaa wa milele ambao taifa la Iran, huku likitegemea imani, umoja na muqawama, na chini ya uongozi wa Imam Khomeini (Mwenyezi Mungu aiinue daraja yake), lilisimama dhidi ya uvamizi wa maadui na kuandika fahari kubwa katika historia ya ardhi hii.
Mwaka huu tunaianza Wiki ya Ulinzi Mtakatifu katika hali ambayo adui wa Marekani na Mzayuni kwa mara ya pili ndani ya mwaka mmoja ameivamia nchi yetu tukufu, na kuwaua kishahidi makamanda wengi, viongozi na wananchi wanyonge wa Iran, akiwemo juu kabisa Kiongozi Mkuu wa Umma wa Kiislamu, Imam Khamenei (ra). Kwa mara nyingine tena alionesha kwamba hafungamani na kanuni yoyote ya kibinadamu, wala hajizuii na njama yoyote inayolenga kuwapiga wananchi na kuangamiza uwepo wa taifa. Hata hivyo, ujasiri na ushujaa wa vikosi vya kijeshi vyenye nguvu, pamoja na ushiriki wa wananchi wenye uelewa na wa kuvutia, ulikuwa jibu kali kwa maadui na ukawazuia kufikia mipango yao mibaya.
Ulinzi Mtakatifu wa miaka nane wa taifa la Iran, sambamba na Ulinzi Mtakatifu wa siku kumi na mbili na Vita vya kulazimishwa vya Ramadhani, ni awamu tatu za juhudi za taifa la Iran ambazo zina mifanano kadhaa, zinaunganisha historia ya muqawama wa taifa la Iran, na kuifanya safu ya umoja ya wananchi mbele ya adui wa pamoja kuwa yenye mshikamano zaidi.
Huenda tukataja mifanano kumi ifuatayo kwa awamu zote tatu za kuilinda nchi, ambayo yote ni miongoni mwa fahari ya taifa la Iran:
1. Kutokuwiana kwa nguvu katika vita:
Katika vita vyote vitatu, maadui walikabiliana na taifa la Iran wakiwa na vifaa na misaada mikubwa kutoka duniani kote, lakini taifa la Iran lilisimama bila kuwa na chochote mikononi isipokuwa imani ya chuma, na likaipita kwa mafanikio mitihani hii ya kiashura.
2. Msimamo wa kujihami wa taifa la Iran:
Katika vita hivi vyote, Iran daima ilikuwa katika nafasi ya kujihami na haikuwahi kuwa mwanzilishi wa uvamizi, bali ilisimama dhidi ya mashambulizi ambayo kwa mtazamo wake yalikuwa kinyume na misingi ya kibinadamu, ya ubinadamu na ya kimataifa.
3. Kukabiliana kwa wakati mmoja na maadui wa nje na vibaraka wa ndani:
Katika kila moja ya vita hivi vitatu, taifa la Iran lilikabiliana kwa wakati mmoja na vitisho vya nje na usaliti wa ndani.
4. Iran na mfumo wa Kiislamu kulengwa:
Katika vita hivi vyote, maadui hawakulenga tu ardhi ya Iran na kuigawa, bali pia walilenga msingi wa mfumo wa Kiislamu na maadili yake.
5. Ukatili na unyama katika mashambulizi ya adui:
Kutumia silaha zilizopigwa marufuku, kuwaua wanawake na watoto, kushambulia shule na hospitali, pamoja na kuharibu miundombinu, ni sehemu ya jinai za adui katika vita vyote vitatu.
6. Muqawama na ustahimilivu wa taifa la Iran:
Katika vita vyote vitatu, taifa la Iran, kwa muqawama wake wa mfano, subira, uvumilivu na mapambano ya kishujaa, lilimzuia adui kufikia malengo yake mabaya.
7. Msaada ya Mwenyezi Mungu:
Ahadi ya nusura ya Mwenyezi Mungu iliyotajwa katika Qur’ani Tukufu ilitimia wazi katika vita vyote vitatu, na ikalisaidia taifa la Iran katika nyakati zake ngumu zaidi.
8. Vita kama shule ya kujenga binadamu:
Vita vitakatifu, iwe vya miaka minane, siku kumi na mbili au Vita vya Ramadhani, viliandaa mazingira ya ukuaji wa kiroho, kimaadili na kibinadamu kwa taifa la Iran. Katika vita vitakatifu vya miaka nane, vizazi vipya vilijengwa katika uwanja wa vita na chipukizi zenye baraka zikazaliwa.
9. Athari za upinzani kwa dunia:
Kusimama imara taifa la Iran katika vita hivi mara tatu imekuwa mfano kwa wapenda uhuru wote duniani na pigo kubwa kwa nguvu na utawala wenye kiburi.
10. Makadirio potofu ya adui:
Katika vita vyote vitatu, maadui, kwa makadirio yao yasiyo sahihi, walidhani kwamba taifa la Iran lingejisalimisha mbele ya shinikizo, lakini hawakutambua nguvu ya imani na azma ya Mwenyezi Mungu ya taifa hili.
Inafaa kuzingatiwa kwamba Vita vya Ramadhani na awamu ya tatu vilikuwa hatua ya ukamilishaji na ustaarabu katika ubora na ulinzi wa taifa la Iran mashujaa, ambapo sifa zake muhimu zaidi ni hizi:
1) Kuondoka mapazia yote ya unafiki na makabiliano ya moja kwa moja na utawala wa kiburi duniani, kuanguka heshima na nguvu yake, kuondoka hofu dhidi ya adui wa Marekani na Uzayuni, na kudhihirika ukweli uliofichika mbele ya watu wote duniani.
2) Kufichuliwa na kutumika kwa maendeleo ya kushangaza ya kijeshi na kiulinzi, pamoja na teknolojia za hali ya juu za kiusalama na kijeshi, mbele ya dola kubwa zaidi ya kishetani duniani.
3) Kuenea mapigano katika eneo na kushambuliwa moja kwa moja kambi za kijeshi za adui katika eneo lote.
4) Kudhihirika nguvu ya Iran ya kuzuia mashambulizi, pamoja na utawala wa Iran juu ya bahari ya Ghuba ya Uajemi na Mlango wa Hormuz.
5) Kuzinduka kukubwa na uamsho mpana wa taifa la Iran mashujaa.
6) Kuungana mataifa ya Kiislamu na watu wapenda uhuru duniani, pamoja na kuinuka kiwango cha muqawama.
7) Kuundwa na kuimarishwa mnyororo wa mhimili wa muqawama kutoka Iran, Iraq, Lebanon, Yemen, Palestina na maeneo mengine, pamoja na kutangazwa sera ya umoja wa maeneo mbalimbali dhidi ya adui.
8) Mwonekano wa kimataifa wa vita hivyo, kubadilika mizani ya nguvu na kutoa mfano kwa mapambano ya kimataifa na ya kistaarabu.
Uongozi wa Hawza, pamoja na kuadhimisha Wiki ya Ulinzi Mtakatifu, unasisitiza nafasi isiyoweza kubadilishwa ya wanazuoni wa dini na Hawza katika kuunga mkono nyanja za muqawama na mfumo mtukufu wa Jamhuri ya Kiislamu, pamoja na kulea vizazi vya wapiganaji; na unasisitiza kuendeleza njia ya mashahidi na misingi ya Imam aliyepita na Imam Shahidi (Mwenyezi Mungu aziinue daraja zao) pamoja na Kiongozi Mkuu (Mwenyezi Mungu ailinde). Pia unawaomba wanafunzi wote wa dini, walimu na watendaji wa Hawza, kwa kupata msukumo kutoka kwa Maraji' wakuu wa taqlidi (Mwenyezi Mungu aendelee kuwalinda), na kwa kujifunza kutokana na mashahidi wenye daraja kubwa, wafafanue mafundisho ya jihadi na Ulinzi Mtakatifu na kuyafikisha kwenye kizazi cha vijana, ili kutekeleza nafasi yao katika kuhifadhi urithi huu wenye thamani.
Aidha, pamoja na kutoa pongezi na shukrani kwa viongozi waheshimiwa, mihimili mitatu ya dola, vikosi vya kijeshi vyenye heshima na nguvu, na wananchi mashujaa na jasiri wa Iran, unawataka waendelee kuwa imara, wenye subira na wastahimilivu, wasisite kusimama dhidi ya adui, na wajitahidi katika kutatua matatizo ya kiuchumi, kuongeza mtaji wa kijamii, kuimarisha umoja na mshikamano mpana, na kupambana na madhara ya kiutamaduni, kimaadili na kijamii.
Na hakuna nusura isipokuwa kutoka kwa Mwenyezi Mungu, Mwenye Nguvu, Mwenye Hekima.
Wassalaamu alaykum warahmatullaahi wabarakaatuh.
Ali Reza A’rafi
Mkurugenzi wa Hawza nchini Iran.
Maoni yako